Kapihan ni Qroon -- Talaarawang Tagalog

Tinipong kaisipan, saloobin at kung anu-ano pang bagay.

Google
 
Web Kapihan ni Qroon

Monday, May 14, 2007

Halalan, Kahirapan, Hangalan

Nakaboto na kami ni Joy kanina. Magkaiba kami ng mga ibinoto sa mga lokal na kandidato. Hindi nya isinulat yung mga maiingay at nakabubulahaw ang campaign jingles. Ako naman ay pulitikal na dahilan. Meron din kaming mga blangko. Bakit? Wala kasi kaming mapili. Ayaw naman namin ng lesser evil.

Sa loob ng presinto, merong mga poll watcher. Ang siste nito, nagbubulong ng mga kandidato nila! Tsk! Lalo naming hindi ibinoto ang mga ikinakampanya nila. Isa lang ang maibubunyag kong ibinoto namin, ang partylist na AKAPIN. Bakit? Dahil sila ang ilan sa mga tunay na nangangailangan ng kinatawan sa kongreso, ang mga may kapansanan.

Kanina rin ay napanood namin sa telebisyon ang panayam sa isang kongresista at isang senador. Ayon sa kanila ay panahon na upang magkaroon ng mas mataas na pamantayan upang makakandidato. Kailangang nakapagtapos ng kolehiyo dahil sabi nga, kung ang mga pulis ay kailangang tapos ng pag-aaral ay bakit nga naman hindi rin gawin ito sa presidente at iba pa.

Ayon din sa kongresista, ay bumababa ang kalidad ng mga debate sa mababang kapulungan ng kongreso. Ganun din naman, ayon sa senador, kailangang malalim ang alam ng isang kandidato tungkol sa mga batas at lehislatura. Ano nga naman daw ang magagawa ng isang artista, boksingero at kung sinu-sino pa.

Sa unang pakinig, ay mapaniniwala kang ito nga ang katugunan upang gumanda ang pamamalakad at paggagawa ng batas. Ngunit kung iisipin natin, ay hindi ito ang solusyon sa mga suliranin. Lilikha lamang ito ng gulo at maaaring samantalahin ng ilan upang makakuha ng simpatya sa nakararami.

Edukasyon pa rin. Sa isang bayan o pamayanang marami ang nakapag-aral ng tama ay hindi na kailangang higpitan ang pamantayan sa pagkandidato.

Labels: , ,

|| nilaga ni qroon, 1:38 PM

4 Ang nakihigop:

Ang dami talagang mga Pinoy na binabase ang pagpili ng mga leaders sa kasikatan lamang. Kasi naman dito satin kung sino sino lang ang pwedeng humabol for public office eh napaka delikado biruin buong bansa nag susuffer. grrrr.....
Blogger marie, at 3:46 PM  
tama ka ingkong etoy, magdudulot lang yun ng kalituhan sa mga nanood. hay ang batas nga naman ng tao, sangkaterba at nabubulok na sa dami ng naipasa sa mababa at mataas na kapulungan. Sampung utos nalang ng diyos, dipa nasusunod yon pa kayang gawa ng ating mga mabubutas.

Ang kailangan natin yong tunay na nagseserbisyo, nararamdaman naman yan ng mga tao kahit hindi mo ilagay ang pangalan sa bawat project na pinagawa mo. Bigyan ng tamang edukasyon ang mga maliliit para malaman nila kung sino ang karapat-dapat, wag nilang gawing lalong mangmang at pagsamantalahan.

24 na senador at biyon bilyon ang pork-barrel. May sapat na pera ang pilipinas at kayang baguhin ang buhay ng bawat isang pamilyang filipino, kung magagamit lang ito sa tama!
Anonymous Anonymous, at 3:23 PM  
sa min dalawang beses na nagbrown-out. At patigil-tigil pa ang pagbilang. Nakakainis! Kung pede lang na ako na lang pumunta dun at magbilang gagawin! KAso una, wala pa ako sa tamang edad at ikalawa papahintulutin ba nila ang isang estudyante na 2lad ko na makialam.

Tama nga! Dapat tapos ng kolehiyo ang mga tumatakbo sa pulitika. Pero, hindi naman natin masasabi kong talagang magiging epektibo silang mga lider ng bansa. Hayyy ewan ko na!
Anonymous Anonymous, at 8:36 PM  
Marami ngang iregularidad noong nakaraang halalan. Ngunit kahit papaano ay may maganda akong nakita. Umaangat na ang antas ng pagpili ng mga tao. Mapapansin nyo na hindi nanalo ang mga artistang kandidato sa senado. Ganoon din ang ilang atleta na nakilahok sa halalan.

Ngunit ang tanong nagkaroon ba ng tamang pagpipilian ang mga tao? May mga lugar na ang kandidato ay isang artista kalaban ang isang batikang pulitiko o angkan ng mga pulitiko.

Malawak pa rin ang mga dayaan. Hindi pa rin lubos na nababago ang kalakaran sa pulitika. Madumi pa rin. Pero unti-unti ay may pagbabagong nagaganap.

Pasasaan ba at mananawa rin ang mga tao. Magigising din sa katotohanan.
Anonymous Anonymous, at 12:07 PM  

Makihigop na!